“Beast of Burden,” Bobby Wong, Jr. (www.postcardsfrommanila.com)
PIHO SA LA-O
Wara takon it subo,
Wara’t pag alang-alang,
Daw karbaw sa lamawan;
Gausap ka binalon nga hilamon.
ANG LUMPIA MAY SARSA
Kundi timo mag-abot,
Kundi timo magkadto,
Kun san-o ko gusto
Agud ang ugtas magpasuksuk
Sa akon sang imo tsinelas -
Bisan ikaw suba nga bugalon
Sa taytay pa matabok
Pakadto sa akon.
Ang imo pagka-ila nga daw sa ilahas,
Akon tuubon sa sinupot nga panguy-ab:
Agud maghagop nga daw pating
Kag anta nga kuring.
PAGKAPANAS SANG HAPAW SA LANGIT
Tungod sa batak sang akon dughan
Nga daw butong sang naluyag nga bulan
Ikaw makatilaw sang wala nimo mauyatan
Nga ang imo pagkahuya
Amo ang sampat sa akon paghulat
Daw dama de noche nga gabuskag
Lamang sa sirum pagkadula sang sanag.
ANG GUGMA SANG KARBAW
Ikaw makabangod sang gugma
Nga indi ka kasampot
Kay nagpitla imo dila
Sa dulot sang dalit sang pagkahidlaw
Sa akon sungay nga mabu-ot
Sa akon lawas nga mabukod nga matambok
Sa sulod sa panit nga magutok
Ang hapdi sang imo wa-ay nagahirab nagakurog
ANG KAW-IT KANG MARTILYO
Ginpaypayan sang haron sang panganod
Ang haron kang ana kalo
Samtang nagapamanday sa atop
Gindagit ang kainit
Apang ang mga balaydan nga ginlabo
Kag ginlansang wala magabot
Ang kisami sang langit narumpag
Naghanot sa iya antos.
__________________________
Si Nikos H. Primavera, 38, taga Sta-Cruz, Arevalo, Iloilo City. Nagtapos sang BA Sociology-Management sa UP in the Visayas sang 1998. Ang iya thesis amo ang F. Sionil Jose’s The Rosales Novels: A Sociological Inquiry. Nabalhag siya sa Mantala (NCCA, 2000) kag sa Home Life Magazine (2001). Fellow siya sa Hiligaynon sang nagligad nga IYAS National Writers Workshop sa University of St. La Salle sa Bacolod City nga isponsor kaimaw sang NCCA.
Filed under: DAGYAW-MANUNULAT, HILIGAYNON Tagged: Binalaybay, Hiligaynon, Nikos Primavera
