Litrato: Jonathan P. Jurilla. Halin sa Facebook album nga “Still Life.”
Ni JP ANTHONY CUÑADA
Atty. JP Anthony Cuñada, tubo sang Pilar, Capiz. Labor kag litigation lawyer nga may opisina sa Pasig kag sa madali na lang, sa Capiz. Naga-apprentice sa pag-asikaso sang duta kag mga palanublion.
Kon wala ka
Ang pagsinugilanon kaangay
sa pagsakay sa salakyan
nga wala kariton.
Masadya ini sa mga bata
nga nagahampang
apang indi sa mga tigulang
bangud luyag naton
may malab-ot nga doog.
Maskin sa diin nga doog
nga masarangan lab-oton
sang gasolina, sumsuman,
ilimnon ukon kahulogbon.
Ang pagtipon sang imo mga abyan
ginabulag sang kalinong nga malapad pa
sa antad sang dagat
sang imo ginahamtangan.
Ngaa ang mga tinaga
nga kon makalab-ot man
sa punta sang dila,
nagapabilin nga nagaalungayngay didto?
Wala ang kahagpok
sang imo kadlaw
nga daw hilaw nga mangga
nga makapaagay sang laway.
Para kay Alberto Edzel Sualog
Filed under: DAGYAW, HILIGAYNON Tagged: Binalaybay, Hiligaynon, JP Anthony Cunada
